Hendbollistet e Kosovës do të paraqiten në Grupin 2 të fazës së parë kualifikuese për Kampionatin Botëror që mbahet vitin e ardhshëm.
Shorti i tërhequr të martën në Vjenë të Austrisë, ka përcaktuar që Kosova të jetë në të njëjtin grup me Bosnjë e Hercegovinën dhe Belgjikën, ka njoftuar FHK-ja.
Kosova, në short ishte në vazon e parë për shkak të ngritjes së vazhdueshme që e ka pasur në vitet e fundit.
Ndeshjet e grupit të Kosovës pritet të zhvillohen në fund të muajit tetor, saktësisht prej datës 25 deri më 27.
Gjasat janë të mëdha që ndeshjet e këtij grupi të zhvillohen në Kosovë, por vetëm nëse Belgjika nuk e shfrytëzon të drejtën e organizimit të turneut.
“Grupi vlerësohet solid, ndërsa synim i Kombëtares sonë do të jetë vendi i parë dhe avancimi në play-off”, ka shkruar FHK-ja.
