Bordi i Asociacionit të Komunave të Kosovës (AKK) ka kërkuar nga Ministria e Financave, Punës dhe Transfereve, që sa më shpejt të bëj bartjen e mjeteve financiare të Komunave nga rritja e të hyrave vetanake nga viti 2023.
E kryetari i Asociacionit të Komunave të Kosovës, Sazan Ibrahimi ka thënë se këto mjete janë të Komunave dhe duket shumë absurd që mjetet e Komunave të bllokohen nga niveli qendror.
Ai ka thënë se të hyrat vetanake të vitit 2023, kapin shifrën e miliona eurove
“Komunat që kanë tejkaluar planifikimin e të hyrave vetanake për vitin 2023 kanë aprovuar këtë rritje buxhetore në Kuvendet e Komunave përkatëse mirëpo, MFPT ende nuk i ka bartur këto të hyra dhe i zvarrit pa asnjë arsye”, ka thënë kryetari.
Derisa, kryetari tha se ministria e ka obligim ligjor që këto mjete t’i bartë te komunat sepse janë të hyra vetanake të komunave.
“Duke marrë parasysh që këto mjete nga rritja e të hyrave vetanake të komunave për vitin 2023 janë të destinuara për projekte kapitale, me këtë veprim niveli qendror i fut në rreziqe komunat që të mos mund të procedojnë në publikimin e projekteve për të cilat janë destinuar”, tha ai.
Ndryshe, ai u ka bërë ftesë publike Ministrit të ndërmarrë veprimet konkrete ligjore për realizimin e të drejtës së Komunave, ngase sipas tij në të kundërtën po neglizhohet në dëm të Komunave e rrjedhimisht në dëm të mosrealizimit të projekteve kapitale në interes të qytetarëve./teve1.info/