Mauna me domate po bëhet gati për eksport.
Mirëpo për ta dërguar jashtë vendit, biznesi duhet pajisur me fito-certifikatë nga inspektorët sanitarë.
Kjo i mundëson biznesit të bëjë eksport valid karshi çdo kontrolli kudo deri në vendin e origjinës shkon.
Mirëpo ngaqë në këtë sezon vere, puna është shtuar, eksportuesit po hasin në vështirësi.
“Kam probleme me fitosanitar. Këtu fito punon vetëm deri të premten, ne kemi çdo ditë eksport. Të shtunën nuk punon fito në Prizren, psh e cakton një herë në javë fito në Prizren, Pejë, Prishtinë edhe të dielën nuk punon fare. A na çdo ditë kemi eksport”, thotë Nehat Thaçi- eksportues.
Andaj Thaçi ka një kërkesë për institucionet.
“Që të kemi fito çdo orë psh, se në Shqipëri e Maqedoni, Serbi e Mal të Zi fito ipet edhe mas orës 4-5-6 , 1 sahati t’natës ipet fito, këtu deri në 4. Na deri në 4 s’po mundemi me bo produktin të gatshëm , atëherë duhet me prit të nesërmen me bo eksport”, thotë ai.
Mirëpo kapaciteti i inspektorëve sanitarë sipas AUV-it nuk është i mjaftueshëm sa për ta përmbushur kërkesat e eksportuesve.
“Ne si autoritet aktualisht kemi të punësuar vetëm 14 inspektorë fitosanitarë të cilët kanë mandatin për lëshimin e fito-çertifikave për të gjitha ngarkesat eksportuese të produkteve me origjinë bimore dhe ne me këtë kapacitet e kemi të pamundur të bëjmë më shumë se sa që jemi duke bërë tani”, shprehet Lamir Thaçi nga AUV.
Sipas Agjencisë së Ushqimit dhe Veterinarisë, ditëve të shtune organizohet kujdestari në mënyrë që t’u lëshohen fito-çertifikata bizneseve të cilat paraqesin kërkesa.
Ndërkaq, bizneset duhet të njoftojnë trupën inspektuese 24 orë më herët në mënyrë që inspektori kompentent të kompletojë lëndën për eksport.
