I dënuari për vrasjen e politikanit serb, Oliver Ivanoviq, Marko Roshiq ka ikur nga duart e shtetit qe dy javë. Ai dyshohet që gjendet në Serbi.
Për të njëjtën vepër me 28 qershor Gjykata Themelore në Prishtinë dënoi edhe tre persona të tjerë, edhe Nedeljko Spasojeviq, Dragisha Markoviq dhe Zharko Jovanoviq me nga 4 vite burgim secili.
Të kontaktuar nga televizioni, avokatët e Spasojeviq dhe Jovanoviq kanë thënë se ata ndodhen në Mitrovicë të Veriut.
Tëvë1 ka tentuar disa herë që të bie në kontakt edhe me avokatin e të dënuarit,Dragisha Markoviq, Dejan Vasiq por që nuk ka qenë e mundur.
Ndërkohë, përpjekjet e Policisë për ta kapur Roshiqin po vazhdojnë.
“Ketë person (Marko Roshiq) e kemi në kërkim që nga 28 Qershori 2024 dhe që nga ajo ditë nuk është i qasshëm për neve.Është vendos nëpër sistemet e kërkimit Policor dhe në rast se hasim në të apo pranojmë informacion se ku është, i njëjti do të arrestohet”, ka thënë Veton Elshani, zëvendësdrejtor i Policisë së Kosovës për rajonin e veriut.
Krejt këto raste të arratisjes që ndodhën së fundi sipas juristit, Anton Nrecaj duhet të shihen si alarm i fundit.
“Raste e fundit kanë ndodhë pikërisht situata duke dhanë një mesazh si sinjal të fundit që institucionet e shtetit të mendojnë mirë se ku është problemi i arratisjes së të burgosurve nga burgjet e Kosovës të cilët që menaxhohen nga shteti”, thotë Nrecaj.
Tëvë1 ka dërguar pyetje në Gjykatën Themelore nëse kanë kontaktuar me Policinë për të parë nëse të akuzuarit e tjerë janë në vendbanimet e tyre apo nëse do të vendoset ndonjë masë ndaj tyre, por nuk kanë kthyer përgjigje.
