Afër 26 mijë euro ka shpenzuar kryetari i Prishtinës Përparim Rama së bashku me kabinetin e tij, nga muaji shkurt deri në maj të këtij viti.
Për këtë periudhë katër mujore, i pari i kryeqytetit shpenzoi 5 mijë e 647 euro në udhëtime zyrtare jashtë vendit, derisa 3 mijë e 475 euro kanë shfrytëzuar pjesa tjetër e kabinetit për mëditje dhe udhëtime zyrtare, brenda e jashtë vendit.
Para më shumë u shpenzuan për bileta të avionit.
Fiks 12 mijë e 803 euro janë shpenzuar për 7 udhëtime.
Vetëm në njërin prej këtyre udhëtimeve të kryetarit Rama së bashku me dy prej stafit të tij, biletat kanë kapur shifrën prej 5 mijë euro.
Kurse 2 mijë euro janë blerë biletat nga një agjenci e aviacionit për një udhëtim të kryesuar nga kryetari, shoferi i tij dhe këshilltarja për qeverisje të mirë.
Rama dhe kabineti i tij shpenzuan para edhe në dreka, ku 12 prej tyre kapin shumën e 4 mijë euro.
Dreka që harxhoi më shumë kuletën e komunës ishte në vlerë prej 1 mijë e 377 euro, në njërin prej restoranteve në kryeqytet.
Përgjysmë më pak ka kushtuar një drekë tjetër, prej 580 euro, derisa dreka më e lirë ishte në vlerë prej 51 euro.
E krejt këto shpenzime po i sheh të panevojshme asamblisti i Lëvizjes Vetëvendosje, Gëzim Sveçla.
Të dhënat e shpenzimeve për kryetarin, nënkryetarin si dhe drejtorët i ka dërguar Komuna e Prishtinës pas kërkesës së televizionit për qasje në dokumente zyrtare.
