86 vjeçari Daut Elshani në cilësinë e dëshmitarit mori edhe njëherë rrugën për të dëshmuar kundër Ekrem Bajroviqit, i cili akuzohet se ka kryer krime lufte në Komunën e Istogut.
Me bastunin e tij dëshmoi para trupit gjykues. Meqë është në moshë të shtyrë, iu nevojit edhe një karrige.
Elshanit më 7 maj 1999 iu vranë tre djemtë, vëllai dhe djali i vëllait të tij, për çka e akuzon Bajroviqin, i cili në atë kohë ishte polic.
Gjthë ngjarja e tmerrshme që ndodhi, dëshmitari Elshani ka thënë se e kishte parë nga dera e drurit, ku edhe ishte fshehur.
Aty thotë se e kishte parë Bajroviqin në oborrin e shtëpisë së Demë Zeqirit.
Pas Elshanit, për të dëshmuar erdhën edhe Ismet Kikaj dhe Bajram Dautaj, që kishin marrë pjesë në varrosjen e kufomave në varrezat e Saradranit.
Elshani, Kikaj dhe Dautaj kanë qenë tre dëshmitarët e fundit që kanë dhënë dëshminë e tyre.
Ndaj ish-policit Ekrem Bajroviq, Prokuroria Speciale e Kosovës kishte ngritur aktakuzë në shtator të vitit të kaluar.