Kombëtarja e Zvicrës ka startuar me fitore në Kampionatin Evropian “Gjermania 2024”.
Në duelin e parë të Grupit A, Zvicra triumfoi ndaj Hungarisë me rezultatin 3:1. Me këtë fitore, Zvicra ka tri pikë në grup sikurse edhe Gjermania, e cila në ndeshjen hapëse të “Euro 2024” mposhti Skocinë (5:1).
Ndërkohë, Hungaria dhe Skocia mbesin pa pikë pas xhiros së parë në këtë grup. Sulmuesi Kwadwo Duah e kaloi Zvicrën në epërsi në minutën e 12-të, përpara se rezultatin ta dyfishoj Michel Aebischer (45’) në fund të pjesës së parë.
Në të dytën, Hungaria e ngushtoi epërsinë me anë të Barnabas Varga (66’) por kjo ishte e tëra që bënë hungarezët në këtë përballje.
Rezultatin final të këtij takimi e vulosi Breel Embolo në minutën e tretë të kohës shtesë – 3:1.
Te Zvicra gjatë tërë ndeshje luajti kapiteni Granit Xhaka, ndërsa Xherdan Shaqiri e Ardon Jashari nuk u akitivizuan fare.
