Instituti Hidrometeorologjik i Kosovës ka bërë të ditur se fundjava në Kosovë do të karakterizohet nga mot kryesisht i qëndrueshëm, me vranësira të shpërndara dhe intervale me diell, por me temperatura të ulëta, sidomos gjatë orëve të mëngjesit.
Sipas parashikimit të IHMK-së, të shtunën, më 7 nëntor, në shumë zona pritet të ketë mjegull gjatë orëve të hershme të mëngjesit, ndërsa gjatë ditës moti do të jetë me vranësira të shpërndara dhe periudha me diell.
Temperaturat minimale do të lëvizin nga -3 deri në 0 gradë Celsius, ndërsa ato maksimale do të arrijnë nga 6 deri në 11 gradë Celsius. Era do të fryjë nga veriperëndimi, me shpejtësi prej 1 deri në 4 metra në sekondë.
Mot i ngjashëm parashihet edhe të dielën, më 8 nëntor, me vranësira të shpërndara dhe intervale me diell. Në disa zona të ulëta pritet të paraqitet edhe mjegulla.
Temperaturat minimale do të zbresin nga -4 deri në -1 gradë Celsius, ndërsa maksimalet do të sillen nga 8 deri në 12 gradë Celsius. Era do të fryjë nga verilindja, me shpejtësi prej 1 deri në 3 metra në sekondë.
