Takimet i kanë të shpeshta.
E hallin e kanë të përbashkët.
Secili prej këtyre banorëve të lagjes Bregu i Diellit në Prishtinë paguan tatimin në pronë, por i ka dal një telash me tokat e tyre me një ligj që daton që nga ish Jugollsavia.
Derisa të gjithë janë banorë të këtyre shtëpive, komuna e Prishtinës është titullar juridik i tyre.
Kjo bazuar në nenin 29 të ligjit 827 për marrëdhënie themelore juridike-pronësore, ligj i cili u përcaktua në vitin 1980 në ish-Jugosllavi.
E ndonëse me plotësim ndryshimin e tij në vitin 1996, ish pushteti e shfuqizoi këtë ligj, duket që Gjykatat në Kosovë janë të vetmet që ende funksionojnë me të.
Kjo duke u thirrur në rregulloren e UNMIK-ut 1999/24, sipas të cilës ligjet të cilat nuk janë diskriminuese zbatohen përmes kësaj rregullore.
E ka mbi 30 vjet që qytetarët po kërkojnë kthimin e pronës së tyre.
“Pronarë të këtyre shtëpive dhe pllaceve jemi qysh para viteve të 70-ta të shek të kaluar. Kemi patur në vitet e robërisë serbe në vitin 1985 një sulm agresiv ndaj të drejtave tona. Në atë vit neve na është ekspropriu prona padrejtësisht”, thotë Haki Kasumi, banor në lagjen “Bregu i Diellit”.
E të njëjtat kërkesa, sipas tyre gjykatat po i refuzojnë.
Prandaj Xhafer Gashi ndihet i rënduar nga të gjitha tentimet e pasuksesshme.
“Na kemi qenë të ngarkum edhe psiqikisht edhe fizikisht sepse na kemi jetu me një stres, me një ankth se e kemi ndi veten se jemi në tokën e huaj apo në vend të huaj edhe e kemi kundërshtu”, shprehet Xhafer Gashi, banor në këtë lagje
Madje për shpronësimin e pronave të tyre, ata thonë se nuk janë paguar fare.
“Si është e mundur kur neni 46 i Kushtetutës së Kosovës e garanton të drejtën e pronës kurse komuna e bën pronën tonë pa shpronësim, pa asnjë pagesë, pa asnjë ofertë”, thotë Skënder Sylejmani, përfaqësues i lagjes “Bregu i Diellit”.
Megjithatë të drejtën e tyre pronësore e kanë kërkuar gjithnjë.
“Na është kthy si përgjigje që kjo çështje duhet të zgjidhet përmes komunës, kurse komuna më herët kemi marrë përgjigje, që duhet përmes gjykatës”, thotë ai.
Për tëvë1, komuna e Prishtinës bëri të ditur se ky institucion nuk ka përgjegjësi.
Ndërsa përkundër faktit që edhe rregullorja e UNMIK-ut shkon në favor të pronarëve privat, problematike mbetet zgjidhja e këtyre çështjeve në gjykata.
“E vetmja gjykatat e Kosovës ende e zbatojnë këtë ligj me çka cenohet rëndë e drejta themelore e personave fizik, siç është e drejta pronësore”, shprehet avokati për çështje pronësore, Shemsedin Thaçi.
Televizioni ka dërguar pyetje edhe në Gjykatën Themelore në Prishtinë dhe atë të Apelit, por deri në publikimin e kësaj kronike nuk ka marrë përgjigje.
Po ashtu Tëvë1 ka dërguar pyetje në Ministrinë e Drejtësisë për atë se çfarë është duke u bërë në këtë drejtim, mirëpo as këta nuk kanë kthyer përgjigje.
