Kampioni i Kosovës në futboll, Ballkani i Suharekës të mërkurën ka konfirmuar se kapiteni Edvin Kuç dhe mbrojtësi i krahut, Armend Thaqi nuk do të jenë pjesë e ekipit për sezonin e ri.
Nëpërmjet një postimi, Ballkani ka falënderuar të dy futbollistët për angazhimin dhe kontributin e dhënë në sukseset historike të klubit. Kuç dhe Thaqi, do të largohen nga Ballkani si lojtarë të lirë dhe do ta vazhdojnë karrierën jashtë kufijve të Kosovës.
Kuç do të transferohet në Azerbajxhan te Neftchi Baku, ndërsa Thaqi do t’i bashkohet Clujit të Rumanisë.
“Edvin Kuç dhe Armend Thaqi janë modeli që do t’u shërbejë gjeneratave, janë kulminacioni i profesionistëve sportiv, definicioni i vërtetë i titullit kapiten! Të gjitha sukseset tona historike, janë të lidhura ngushtë me kontributin e çmuar dhe të pa harruar të dy yjeve tanë. Ata do të mbetën përjetësisht kapitenët unik, që si të tillë motivuan bashkëlojtarët e tyre edhe në momente prej më të vështirave, e prijës të tyre ishin edhe në rrugën drejt glorifikimit. Faleminderit legjenda të FC Ballkanit, ky klub do mbetet shtëpia juaj e përhershme, ku ju presim sërish!”, thuhet ndër të tjera në postimin e Ballkanit.