Dominimi i Besa Famgasit në hendbollin kosovar mund të marrë fund sot dhe atë në palestrën “Karagaçi” në Pejë gjatë ditës së sotme.
Besa në total ka 19 tituj kampioni, ku prej tyre dhjetë i ka rresht dhe këtë dominim total të ekipit total po synon ta ndal skuadra e Rahovecit.
Në serinë finale të play-offit të këtij sezoni, Rahoveci po avancon 1:0 dhe i duhet edhe një fitore për ta fituar titullin e parë në histori të klubit.
Dueli i dytë i kësaj serie finale luhet sot prej orës 19:00, ndërsa vikendin e shkuar Rahoveci triumfoi 34:30 në shtëpi ndaj Besa Famgasit. Në rast se Besa e mposht Rahovecin në Pejë, atëherë kampioni caktohet në ndeshjen e tretë që do të luhet në palestrën “Mizahir Isma” këtë fundjavë në Rahovec.
Në stinorin e rregullt, Rahoveci ka dominuar tërësisht në Superligë dhe ka përfunduar i pari në tabelë me vetëm një humbje, të cilën ia shkaktoi Besa.
Në pesë përballjet e këtij sezoni, Rahoveci ka tri fitore karshi dy humbjeve nga Besa, përfshirë edhe atë në Kupën e Kosovës. Besa në serinë gjysmëfinale të play-offit eliminoi Kastriotin me rezultatin e përgjithshëm 2:1, ndërsa Rahoveci eliminoi Trepçën që e mposhti në të dyja ndeshjet.