Banorët e lagjes “Kalabria” në Prishtinë kanë protestuar para objektit komunal para fillimit të seancës së asamblesë komunale dhe kanë kërkuar një seancë të jashtëzakonshme për diskutimin e planit për lagjen e tyre, raporton teve1.info
Po ashtu, gjatë asamblesë komunale, përfaqësuesi i banorëve, Milot Krasniqi, ka protestuar në shenj pakënaqësie për arrestimin e një banori të lagjes së tyre, me arsyetimin se e ka kërcënuar kryetarin përparim Rama gjatë diskutimit të planit të urbanizmit një ditë më parë.
“Kryetari Përparim Rama ka thënë që nëse nuk e qesin pikë të rendit të ditës Kalabrinë me datë 24, kemi me kallë Kuvendin. Kryetari Rama i ka thënë këto fjalë në hollin e Kuvendit. Basri Tërnava vetëm i ka cituar fjalët e kryetarit Rama”, ka thënë Krasniqi.
Ai tha se familjarët e Tërnavës i kanë lajmëruar se e kanë arrestuar dhe ia kanë angazhuar një avokat sipas detyrës zyrtare.
“Kërcënimi publik ka ndodhur me 8, dje është arrestuar pasdite, nuk e di pse e kanë shtyrë deri dje, nëse është dashur të ndërhyhet është dashtë më herët por besoj se shkaku i seancës, por është e paarsyeshme, arrestimi i tij është i paarsyeshëm, dhe shpresojmë që të lirohet. Është e padrejtë mënyrën se si është arrestuar dhe ne si banorë se kemi kërcënuar asnjëherë askënd. Neve na është bërë e padrejtë që nuk është duke kaluar plani për Kalabrinë. Tash i kemi ndjekur të gjitha rrugët, kemi kërkuar takim me Ramën, me asamblistë, vetëm është vonuar dhe nuk janë plotësuar kërkesat tona”, ka thënë Krasniqi.
Gjatë kësaj seance përfaqësuesit e Vetëvendosjes dhe Aleancës për Ardhmërinë e Kosovës, kanë kërkuar një seancë të jashtëzakonshme për të diskutuar vetëm për planin e lagjes “Kalabria”.
Shefi i asamblistëve të PDK-së, Letorim Retkoceri, tha se nga sjellja e drejtuesve të kryeqytetit, Prishtina po trajtohet si zonë e betonizuar.
“S’ka pasur asnjë dokument dhe material për planin në lagjen Kalabria, po ua tregoj rendin e ditës, në një situatë kur si grupe, si grupit të Partisë Demokratike, është dërguar plani zhvillimor komunal, më duhet te them një argument tjetër, e kuptojmë hallin e banorëve sepse nga sjellja Prishtina po trajtohet si zonë e betonizimit dhe planeve me koeficient për grupe të caktuara, kjo s’dihet t’i ndodh Prishtinës, qysh mundet t’u arsyetohet qytetarëve 1.8 e kanë pru sot me idenë e koeficientit 7, çfarë borxhi kem na, nëse kryetari ka borxh dikujt është mirë me tregu, që nga ndërrimi i pronave të Badovcit nuk do lejojmë më të keqpërdoret besimi. Kemi nevojë me pa plane, kem pa qe ka dal në dëgjim publik, si kemi parë ndryshimet”, ka thënë Retkoceri.
Paraprakisht disa banorë të lagjes “Kalabria” në Prishtinë kanë protestuar para objektit të komunës pas pakënaqësive të shfaqura ditë më parë rreth planit rregullues për “Kalabrinë”.
Për arrestimin e një banori në një lagje të Prishtinës ka raportuar edhe Policia e Kosovës në raportin 24-orësh.
Sipas raportit, qytetari e ka kërcënuar kryetarin dhe kryesuesin e Asamblesë Komunave në Prishtinë gjatë diskutimit të planit rregullues të lagjes./EO
Kërcënoi kryetarin dhe kryesuesin e Kuvendit në Prishtinë, arrestohet i dyshuari