Kryetari i Kuvendit të Kosovës, Glauk Konjufca, tha se shteti i Serbisë është përgjegjës për zhdukjen e Ukshin Hotit.
Ai ka kërkuar që për rastin e Ukshin Hotit të merret drejtësia vendore dhe ndërkombëtare
“Sot është 25 vjetori i zhdukjes më dhunë të intelektualit, Ukshin Hoti. Përgjegjëse padyshim për zhdukjen e tij më dhunë është shteti i Serbisë, me mekanizmat e tij. Sapo kinse u lirua nga Burgu i Dubravës, po e priste një veturë aty i organizuar nga shteti serb dhe çfarëdo të këtë ndodhur intelektualit Hoti, përgjegjësinë padyshim e mban shteti okupator serb”, ka thënë ai.
Ndryshe, Kuvendi i Kosovës e ka filluar me një minutë heshtje seancën plenare të së enjtes, në 25-vjetorin e zhdukjes së Ukshin Hotit, raporton teve1.info
Veprimtari i lëvizjes Kombëtare dhe profesori Ukshin Hoti, ishte zhdukur më 16 maj të vitit 1999 në rrethana ende të pandriçuara nga burgu ku po mbahej nga forcat serbe.
Veprimtari i mirënjohur i Lëvizjes Kombëtare, profesori Ukshin Hoti u lind më 17 qershor të vitit 1943 në fshatin Krushë të Madhe të Rahovecit. Ishte profesor, shkrimtar, filozof, intelektual, atdhetar dhe veprimtar i shquar i çështjes kombëtare gjatë viteve 1981-1999.