Sulmuesi i krahut, Arbër Hoxha ka zënë vend në formacionin e javës së 33-të në kampionatin e Kroacisë.
Hoxha ishte më i merituari që Dinamo e Zagrebit triumfoi 2:1 në ndeshjen derbi kundër Rijekës, të luajtur të dielën mbrëma.
Në fakt, Hoxha shënoi golin e fitores për Dinamon duke bërë që ekipi i tij t’i afrohet edhe më shumë titullit të kampionit. Ai u inkuadrua në lojë ndaj Rijekës në minutën e 87-të dhe dy minuta më vonë shënoi golin për rezultatin përfundimtar të ndeshjes.
Kur kanë mbetur edhe tri xhiro deri në fund të kampionatit kroat, Dinamo është lider në tabelë me 75 pikë, katër më shumë se Rijeka që zë vendin e dytë.
Krahas Hoxhës, vend në formacionin më të mirë të xhiros së fundit, ka zënë edhe mbrojtësi Bujar Pllana, i cili pati paraqitje fantastike në fitoren 4:1 të Sllaven Belupos ndaj Goricës. Ndërkohë, pjesë e këtij formacioni është edhe mesfushori i Osijekut, Enis Çokaj pas fitores 3:1 ndaj Lokomotivës së Zagrebit.
