Si “Kuvend i Dështimeve” është quajtur puna e kuvendarëve përgjatë vitit 2023 nga Instituti i Kosovës për Drejtësi. Aty janë numëruar këto dështime të deputetëve, parregullsitë në komisione e në seanca plenare.
Puna e kuvendarëve përgjatë vitit 2023, llogaritet të jetë e dështuar.
Në mesin e të zgjedhurve të popullit, sipas Institutit për Drejtësi, pati edhe të atillë që ishin pasiv.
“Gjatë vitit 2023 deputetët e Kuvendit kanë mbajtur 2 mijë e 114 fjalime, ku me këtë rast 15 deputetë nuk kanë ngritur asnjë çështje nga totali i deklaratave”, tha Naim Jakaj nga IKD.
Disa nisma u konsideruan si të kundërligjshme, ndër to edhe një komision hetimor. Derisa u theksua arroganca e shumicës parlamentare.
“IKD, gjen se Kuvendi themeloi në kundërshtim me Kushtetutën Komisionin Hetimor Parlamentar në lidhje me rastet e dhunës seksuale dhe dhunës në familje ngase ai shkel parimet e ndarjes së pushteteve të përcaktuara me Kushtetutë dhe me standarde ndërkombëtare. Dhe në anën tjeter, shumica parlamentare pamundësoi kryerjen e mandatit të komisionit hetimor parlamentar për rezerva shtetërore”, u shpreh Jakaj.
Mungesa e kuorumit sipas IKD, shoqëroi gjatë gjithë vitit punën e Kuvendit, ku fillimisht në seanca mungonte partia në pushtet, e më pas ato opozitare.
E mungesa e transparencës në punën e Kuvendit përgjatë seancave plenare dhe mbledhjeve të komisoneve parlamentare apo qoftë komisione hetimore, konsiderohet se vazhdon të mbizotërojë.
“Në lidhje me transparencën, IKD gjen se Kuvendi në fusha të caktuara përballet me një mungesë të thellë të saj. Që nga publikimi i gjetjeve në Raportin për punën e Kuvendit gjatë vitit 2022 nuk është bërë lëvizje e duhur dhe pozitive në drejtim të publikimit të të gjitha materialeve me rastin e mbajtjes së një seance parlamentare. E rrjedhimisht edhe votimi elektronik”, deklaroi Jakaj.
Sipas të gjeturave të raportit të titulluar “Kuvendi i dështimeve”, gjatë vitit të kaluar është mbajtur vetëm një interpelancë, ku është gjatë saj kryeministri nuk qëndroi për t’iu përgjigjur pyetjeve të deputetëve.