Prishtina 01 dhe Liqeni, janë skuadrat që do të përballen në finalen e Kupës së Kosovës në futsall.
Kjo ndeshje luhet sot prej orës 20:00 në Pallatin e Rinisë dhe Sporteve në kryeqytet. Si Prishtina 01 ashtu edhe Liqeni, duan ta fitojnë trofeun e parë të këtij edicioni në futbollin e sallës dhe finalja pritet të jetë tejet interesante.
Prishtina 01 është fituese në fuqi këtij trofeu, të cilin synon edhe ta mbrojë. Më fakt, Prishtina po kërkon ta fitoj për herën e tretë Kupën e Kosovës në histori të klubit.
Si kampione e Kosovës, Prishtina 01 vlerësohet favorit në këtë përballje, duke pasur parasysh edhe formën aktuale të dy skuadrave këtë edicion në elitën e futsallit kosovar.
Prishtina 01 prinë në tabelë me 43 pikë të mbledhura, ndërsa Liqeni është i treti me 27 pikë pas 15-të xhirove të zhvilluara. Në dy përballjet e këtij edicioni, Prishtina 01 e ka mposhtur Liqenin, duke triumfuar 2:1 në kryeqytet dhe 5:2 në Drenas.
