Sot, do të përcaktohen skuadrat finaliste të Kupës së Kosovës në futboll.
Prej orës 15:00, do të luhen ndeshjet e kthimit të fazës gjysmëfinale, të cilat ishin të parapara të zhvillohen javën e kaluar. Por, u shtynë për shtatë ditë për shkak se presidentja e Republikës së Kosovës, Vjosa Osmani mori vendim që dita e mërkurë e javës së shkuar, të shpallet ditë zie, në kujtim të të gjitha garave dhe vajzave të vrara në Kosovë si rezultat i dhunës në baza gjinore.
Në fazën gjysmëfinale të Kupës së Kosovës në futboll, po përballen Drita – Prishtina dhe Ballkani – Suhareka. Në ndeshjet e para, të luajtura para dy jave, Prishtina dhe Drita kanë luajtur pa gola kurse Ballkani triumfoi 1:0 ndaj Suharekës.
Sikurse Drita, po ashtu edhe Prishtina synim e kanë finalen dhe fitimin e trofeut, i cili ua mundëson daljen në Evropë. Forma e të dy skuadrave është e ndryshme në kampionat, me Dritën që është e dyta me 58 pikë, dy më pak se Ballkani që është lider kurse Prishtina është e pesta me 43 pikë të mbledhura. Për Prishtinën, opsioni i vetëm për t’u paraqitur në garat e UEFA-s edicionin e ardhshëm edhe triumfi në Kupën e Kosovës.
Ndërkohë, në duelin tjetër Ballkani vlerësohet favorit përball Suharekës, ekip që garon në Grupin A të Ligës së Parë të Kosovës. Krahas mbrojtjes së titullit, Ballkani këtë edicion po synon edhe triumfin në Kupë për herë të parë në histori të klubit.
Ballkani është lider I Superligës me 60 pikë, teksa po ashtu, edhe Suhareka është lidere në Ligën e Parë me 47 pikë, 5 më shumë se Trepça 89.
Ndeshja Drita – Prishtina zhvillohet në stadiumin me bari sintetik në Gjilan, teksa ndeshja Ballkani – Suhareka, në stadiumin e qytetit në Therandë.
