Trajneri nga Spanja, Unai Emery do të jetë në krye të Aston Villas edhe për tri vjet.
Të martën, klubi nga Premier League ka bërë të ditur se Emery e ka rinovuar edhe për një vit kontratën e tij aktuale. Me rinovimin e kontratës, Emery do të jetë trajner i Aston Villas deri në verën e vitit 2027.
Tek Aston Villa janë të kënaqur me punën e Emeryt në klub dhe për këtë arsye kanë dashur ta mbajnë edhe më gjatë. Emery mori drejtimin e Aston Villas në nëntor të vitit 2022, duke e zëvendësuar Steven Gerrardin.
Edicionin e shkuar, Aston Villa përfundoi në pozitën e shtatë kurse këtë edicion po lufton për një vend në Ligën e Kampionëve. Po ashtu, Aston Villa është kualifikuar edhe në gjysmëfinale të Ligës së Konferencës ku do të përballet me Olympiacosin e Greqisë.
