Hendbollistët e Kombëtares U18 të Kosovës, do të kenë një tjetër kampionat të rëndësishëm dhe sfidues, ka njoftuar Federata e Hendbollit të Kosovës (FHK) të martën.
Prej datës 5 deri më 12 maj në Ankara të Turqisë, Kombëtarja jonë do të paraqitet në Kampionatin Mesdhetar. Është ky Mesdhetari i 20-të rresht për hendbollistët e rinj.
“Kombëtaren tonë U18 e presin ndeshje të forta, që do të shërbejnë për rritjen e mëtejme të kësaj gjenerate premtuese”, ka shkruar ndër të tjera FHK-ja.
Kroacia, Franca, Iraku, Mali i Zi, Maroku, Rumania, Tunizia e Turqia janë kombëtaret tjera pjesëmarrëse. Kombëtaret do të ndahen në dy grupe, ndërsa pas fazës grupore do të ketë ndeshje për plasman përfundimtar. Pra programi do të jetë shumë i ngarkuar.
Në muajin gusht, Kombëtarja U18 do të paraqitet në Kampionatin Evropian që mbahet në Prishtinë.
