Portieri i Kombëtares së Kosovës, Arijanet Muriq është i bindur se skuadra e Burnleyt edhe edicionin e ardhshëm do të bëjë gara në Premier League.
Burnley, aktualisht po lufton për ta siguruar mbetjen në elitën e futbollit të Anglisë ndërsa deri në fund të edicionit i ka edhe katër ndeshje për t’i zhvilluar.
Aktualisht, Burnley është i parafundit në tabelë me 23 pikë, tri më pak se Nottingham Foresti që është i 17-të, pozitë kjo që siguron mbijetesën.
25-vjeçari është stabilizuar në përbërjen e parë të Burnleyt javët e fundit, ndërsa deri më tani ka regjistruar 6 paraqitje në Premier League.
Muriq ishte më i merituari dhe më i vlerësuari në fitoren e fundit të Burnleyt 4:1 që e arriti në udhëtim te Sheffield Unitedi. Kjo paraqitje e mirë e portierit të Kosovës erdhi pas dy ndeshjeve të vështira që Muriq i pati ndaj Evertonit dhe Brightonit, të cilat i kushtuan me pikë të rëndësishme Burnleyt.
“Kemi treguar paraqitje të mira në ndeshjet e fundit besoj se mund të sigurojmë mbijetesën, pasi të gjithë lojtarët kemi një ndjenjë të tillë. Puna ime është ta ndihmoj ekipin dhe këtë jam duke e bërë. Është e rëndësishme ta mbajmë këtë ritëm deri në fund dhe të marrim edhe disa pikë”, ka thënë Muriq.
Ai në verën e vitit 2022 iu bashkua Burnleyt nga Manchester City dhe ka kontratë deri në vitin 2026.
