Sot nis seria e gjysmëfinales së dytë të play-offit në Superligën e Kosovës në basketboll.
Në këtë gjysmëfinale, do të përballen Trepça me Sigal Prishtinën, ekipe që u përballen në këtë seri edhe edicionin e kaluar por ekipi nga Mitrovica avancoi tutje me rezultatin e përgjithshëm 3:2.
Ndeshja e parë do të luhet në palestrën “Minatori” në Mitrovicë, sot prej orës 19:00. Përderisa Trepça është kualifikuar direkt në gjysmëfinale si kampione e stinorit të rregullt, Prishtina ka luajtur në çerekfinale dhe në këtë seri ka eliminuar Vëllaznimin me rezultatin e përgjithshëm 2:1.
Në serinë gjysmëfinale, skuadra që shënon tri fitore avancon në finale kurse Trepça e ka përparësinë e terrenit.
Trepça këtë edicion e ka fituar Superkupën, Kupën e Kosovës dhe Ligën Unike, ndërsa Prishtina triumfoi në Ligën Ballkanike.
