Demhasaj i ftuar në emisionin “Këndi i Debatit” në Tëvë1, tha se në Kosovë pretendohet që ende nuk po luftohet korrupsioni, e sidomos korrupsioni i nivelit politik.
“Raporti ka prekur disa fusha që janë shumë të rëndësishme për ne, e para është korrupsioni, pra akoma pretendohet që në Kosovë nuk po luftohet korrupsioni, ose edhe në ato raste kur ka filluar lufta kundër korrupsionit nuk ka përfunduar si duhet sepse nuk ka pasur vendime gjyqësore. Pra flitet që luftohet korrupsioni i nivelit të ulët, mirëpo aspak korrupsioni i nivelit politik, dhe raporti këtë e sheh mjaft shqetësuese”, tha Demhasaj.
Sipas tij, ka kërcënime të shumta nga ana e politikës për gazetarët, mirëpo Qeveria dhe institucionet e tjera publike duhet ta ndryshojnë qasjen që kanë pasur deri më tani kundrejt tyre.
“Çështja tjetër është e lirisë së shprehjes apo në një farë mënyre i kërcënimit të gazetarëve nga ana e politikës, në këtë pikë mendoj që raporti është më i vrazhdë se sa ndonjë herë tjetër. Ne e kemi përcjellur raportin e Departamentit Amerikan të Shtetit në ndër vite, mirëpo nuk ka pasur ndonjë akuzë apo vendim kaq të rëndë të kësaj pjese, do të thotë për lirinë e shprehjes, ose për kërcënime që disa politikanë u kanë bërë gazetarëve. Prandaj mendoj që këtë pjesë duhet Qeveria dhe institucionet e tjera publike ta marrin parasysh, ose të paktën ta ndryshojnë qasjen që kanë pasur deri më tani sa i përket gazetarëve, të mos i akuzojnë, apo t’i mos kërcënojnë gazetarët, sepse liria e shprehjes është e shenjtë për botën demokratike dhe si e tillë duhet të mbetet. Prandaj mendoj që kjo tendenca e deri tanishme e Qeverisë për të kërcënuar, apo për t’i shantazhuar gazetarët duhet të ndalet, liria e shprehjes është tepër e rëndësishme dhe nuk duhet të ketë tendenca që kjo liri të kufizohet nga askush”, deklaroi ai.
