Fatkeqësitë natyrore e dëmet e fizike, u kthyen në fokus edhe nga qeveritarët.
Ministria e Punëve të Brendshme, u kujdes që të gjitha ndërtesat shtetërore të kenë sigurim të tyre në rast të ndonjë dëmi fizik dhe natyror.
Këto rreziqe janë të renditura si zjarri, rrufeja, eksplodimet, terrorizmi, tërmeti, stuhia, fryma, erërat, përmbytja, reshjet e shiut, borës, breshërit, pikjet nga kulmet nga reshjet atmosferike, rrjedhja e ujit nga instalimet e ndryshme duke shkaktuar dëme ne hapësira te ndërtesave, thyerja e xhamave nga çfarëdo shkaktari, dëmtimet e pajisjeve të ndryshme elektrike- makinerike, e rrëzimi i fluturakeve ajrore.
Në dëmtimet që mund t’i shkaktohen ndërtesave shtetërore janë të përfshira edhe dëmet si pasojë e thyerjes së xhamave të dritareve, duke përfshirë demostratat e protestat.
Tërmeti si një nga fatkeqësitë natyrore, vlerësohet se nuk përbën rrezik për dëmtime.
“Krejt rreziku varet edhe nga mënyra sesi kanë ndërtuar e projektuar projektuesit, ndërtuesit e arkitektët. Sepse nëse është punuar dhe projektuar nga arkitektë dhe ndërtimtarë, dhe nëse janë përfillur të gjitha parametrat që dalin nga harta e rrezikut sezmik, nuk ka rrezik fare”, thotë Shemsi Mustafa, udhëheqës i rrjetit sizmik.
MPB i ka listuar edhe institucionet me vlerësimet në aspektin financiar që kërkojnë për t’ua kompensuar dëmet e shkaktuara.
Kryeministria për ndërtimtari, pajisje elektromakineri e inventar – 6 milionë e 273 mijë euro.
Kulla e ndërtesës së Rilindjes për ndërtimtari, pajisje elektromakineri e inventar – 9 milionë e 777 mijë euro.
Pallati i Drejtësisë për ndërtimtari, pajisje elektromakineri e inventar – 23 milionë e 513 mijë euro.
Për 84 objekte shtetërore, vlera totale e kompensimit të dëmit, parashihet të jetë mbi 92 milionë e 488 mijë euro.