Deputetja e Lidhjes Demokratike të Kosovës, Hykmete Bajrami i ka kërkuar falje qytetarëve për gjuhën e përdorur dje gjatë seancës në Kuvendin e Kosovës.
Bajrami në Kuvend dje iu drejtua Grupit Parlamentarë të Vetëvendosjes duke iu referuar si “hajna”, gjë që bëri që të njëjtit ta lëshojnë sallën.
Deputetja në reagimin e saj tha se “njeriu nganjëherë nga helmi qe prodhon ky pushtet dhe mund të përdorë gjuhë që nuk i shërben shëndetit të demokracisë”.
“Qytetarët e Kosovës, pa marrë parasysh se kënd votojnë janë motivi i angazhimit tim politik dhe liria e bindjes së tyre për mua është e shenjtë. Dje kur u debatua për kontratat njëburimore të Qeverisë si burim korrupsioni jam përpjekur të zbërthej korrupsionin që ka përfshirë Lëvizjen Vetëvendosje nga Albin Kurti te Nagip Krasniqi e nga Martin Berishaj deri te Ridvan Muharremi i rezervave shtetërore. Kjo hajni e një mendësie politike që ka ardhë në pushtet me flamurin e antikurropsionit, me ka nxitur të demaskoj mashtrimin, me fjalë ndoshta të pa përshtatshme për kulturën dhe bindjet politke që unë përfaqësoj. Edhe një herë, ju kërkoj falje qytetarëve që mund të jenë prekur nga fjalët që kam përdorur në seancën plenare”, tha Bajrami.
Derisa sipas saj, pasi Vetëvendosje nuk kanë moral në politikë nuk do të thotë që edhe të tjerët nuk duhet ta ruajnë moralin dhe dinjitetin.
“VV-ja ka ardhur në pushtet duke gënjyer, shpifur e akuzuar secilin që i ka dalë përpara. Edhe në seancën e fundit shpifën, gënjyen për t’i mbuluar hajnitë dhe faljen e tokës për Manastirin e Deçanit. Pasi ata nuk kanë moral në politikë nuk do të thotë që ne tjerët nuk duhet ta ruajm moralin dhe dinjitetin! Shihemi në beteja tjera”, tha tutje Bajrami.
Tensione në Kuvend në seancën ku u diskutua për kontratat njëburimore
