Mes tensionesh midis deputetëve, nisi seanca e jashtëzakonshme e së enjtes.
Kjo seancë e thirrur nga grupi parlamentar i Lidhjes Demokratike të Kosovës, rreth dyshimeve për keqpërdorim të parasë publike përmes kontratave njëburimore, bëri që të ketë replika midis pozitës dhe opozitës.
Deputetja Hykmete Bajrami nga LDK-ja tha se janë rreth 1800 kontrata një burimore në vlerë prej rreth 240 milionë euro, pa prokurim publik.
Krejt këto sipas Bajramit, po bazohen në një raport të Zyrës së Auditimit.
“Raporti i fundit i Komisionit Evropian jep statistika alarmante, aty thuhet se në vitin 2022 janë nënshkruar mbi 10 mijë e 200 kontrata në vlerë prej 559milionë euro, e një pjesë e konsiderueshme a tyre mbi 20.8 për qind thuhet se janë dhënë me procedura të negocimit , pa publikim të njoftimit për kontratë. Në mesin e abuzuesve prin KEK-u me 112 kontrata. KEK-u ka negociuar 13 kontrata me një kompani në vlerë prej 5.6 milionë eurosh”, ka thënë Hykmete Bajrami.
Ndaj këtij raporti, kundërpërgjigje pati deputetja nga radhët e Lëvizjes Vetëvendosje Arta Bajralija. Ajo tha se ky raport ishte publikuar para rreth 1 viti.
“ Ky raport është përfunduar dhe është publikuar nga ZKA në maj të vitit 2023, pra para dhjetë muajsh”, tha ajo.
E për këto dyshime të partive opozitare, po kërkohet edhe themelimi i një Komisioni Hetimor parlamentar.
“ Kjo është nëse e qartë që kemi një arsyeshmëri të mjaftueshme që ta nisim një komision hetimor për ta bërë një hetim parlamentar mbi këto kontrata po flasim për 220 kontrata njëburimore për të cilat duhet ta kemi një komision hetimor”, u shpreh Tahiri.
Sipas kryetarit të grupit parlamentar të AAK-së, Besnik Tahiri, janë 30 faqe me kontrata njëburimore.
“ U mundova unë me i printua po iu tregoj pak me i pa, kjo është faqja e parë e kontratave njëburimore, kjo faqja e dytë, kjo faqja e tretë, për mos me hargju letër i kom printuar vetëm pesë faqe sepse janë 30 faqe dokumente A3-shë të kontratave njëburimore” , tha ai.
Ndonëse nga kabineti i Qeverisë në sallë ishin vetëm tre ministra, Liburn Aliu kundërshtoi deputeten e LDK-së për thirrjen e kësaj seance.
“ Nuk po e di as pse më keni thirr, e nderuara e deputete nuk e di pse më keni thirr mu. Krejt çfarë u fol këtu nuk ka të bëjë me mu. Deputetja kur filloj me fol për ministrin e Mjedisit Planifikimit Hapësinor dhe Infrastrukturës, tha 10 milionë, realisht është një”, tha ministri.
Sipas Arben Gashit, do duhej të ishin gjithë ministrat në sallë.
“Kjo është seancë e thirrur për kontratat njëburimore të dhëna nga të gjitha institucionet në Republikën e Kosovës të karakterit nacional, nuk ka të bëjë vetëm me ministrinë tënde”, tha Gashi.
Kërkesën për seancën e jashtëzakonshme të dërguar në Kuvend nga LDK-ja, Mimoza Kusari-Lila e sheh jo profesionale. Ajo akuzoi partitë opozitare për të bëmat gjatë qeverisjes së tyre.
“ Në rezolutë në këtë ftesë për seancë keni kërkuar që këto kontrata me u miratu nga Komisioni për Mbikëqyrje të Financave Publike, a jeni n’veti, a po doni me ia marrë obligimet KRPP-së,…. jo një komision funksional parlamentar”, tha Kusari-Lila.
Pas një debati mbi 3 orësh, deputetët e Lëvizjes Vetëvendosje lëshuar sallën, veprim ky i cili nuk u mirëprit nga partitë opozitare.
Seanca vazhdoi me deklaratat e deputetëve nga opozita.