Së fundmi ambasadorët e shteteve të huaja kanë bërë thirrje ndaj krerëve shtetërorë që të zbatojnë marrëveshjet nga dialogu si parakusht drejt anëtarësimit në organizata ndërkombëtare. Por ish-diplomatët kosovarë thonë se janë skeptik se në rrethana aktuale një gjë e tillë është e mundur.
Janë bërë një vit që kur Kosova ka dorëzuar aplikimin për anëtarësim në Këshillin e Evropës me 12 maj të vitit 2022.
Aplikim për anëtarësim shteti i Kosovës ka dërguar edhe në Bashkimin Evropian dhjetorin e vitit 2022.
Por, që Kosova të anëtarësohet në organizata ndërkombëtare është parakusht zbatimi i marrëveshjeve të arritura në dialog.
Kështu thanë dy ambasadorët, ai amerikan Jeffry Hovenier dhe ai i Bashkimit Evropian, Tomas Szynog , andaj ata i bënë thirrje krerëve shtetërorë që t’i zbatojnë marrëveshjet e arritura në bisedime.
Këto deklarime publike të tyre, po i shohin si shqetësuese disa ish-diplomatë të Kosovës.
Blerim Canaj, ish-ambasador në Gjermani vlerëson se pakënaqësitë e shteteve perëndimore me Kosovën mund të kenë efekte negative.
Kurse, ish-diplomati kosovar në Itali, Albert Prenkaj thotë se është skeptik se me lidershipin aktual, vendi do të anëtarësohet në Këshillin e Evropës.
Tëvë1 ka kërkuar një qëndrim për këtë çështje edhe nga Qeveria e Kosovës, por që nga ekzekutivi nuk i janë përgjigjur interesimit të televizionit.
