Skuadra e Llapit ka shfrytëzuar humbjen e Ballkanit nga Drita për ta ngushtuar diferencën në një pikë të vetme në tabelë. Përderisa Ballkani u mposht të mërkurën 1:0 në udhëtim nga Drita, skuadra e Llapit të enjten, triumfoi në udhëtim te Fushë Kosova.
Në ndeshjen e luajtur në stadiumin “Sami Kelmendi” në Lipjan, Llapi fitoi me rezultatin 3:0.
Me këtë fitore, Llapi ka tubuar 43 pikë, një më pak se Ballkani që është lider dhe tri më shumë se Drita që renditet e treta. Një gol në pjesën e parë dhe dy të tjerë në të dytën, ia siguruan Llapit fitoren e tretë në po aq ndeshje të luajtura në stinorin pranveror.
Mesfushori Hamdi Namani e zhbllokoi rezultatin me golin e shënuar në minutën e 23-të dhe e dërgoi Llapin në pushim me epërsinë prej një goli.
Sulmuesi Muhamet Hyseni shënoi për 2:0 në minutën e 57-të, përpara se Ilir Blakçori të shënoj për rezultatin përfundimtar të ndeshjes në minutën e 68-të.
Për Fushë Kosovën, kjo është humbja e dytë rresht në pranverë, ndërsa mbetet në pozitën e parafundit me 11 pikë të mbledhura.
