Të tre mbrojtësit e krahut të djathtë të Bayern Munichut janë të lënduar.
Kështu, përveç rezultateve negative, bavarezët po përballen edhe me probleme të lëndimeve, sidomos në fazën e mbrojtjes.
Klubi i madh gjerman të martën njoftoi se Noussair Mazraoui ka lëndim me zgjatje të muskulit, dhe pritet t’i mungojë skuadrës tri deri në katër javë.
Marokeni u zëvendësua në humbjen 3:2 të dielën nga Bochumi.
Me atë disfatë, Bayern Munichu tani ka mbetur prapa Leverkusenit tetë pikë larg kreut të tabelës.
Ishte humbja e tretë rresht e Bayernit në të gjitha garat.
Mbrojtësi tjetër, Sacha Boey, që ka luajtur vetëm dy herë qëkur u transferua muajin e kaluar, ka po ashtu problem muskulor.
Nuk është i gatshëm për lojë as Bouna Sarr e as mesfushori Konrad Laimer, që ka luajtur si mbrojtës i djathtë më herët gjatë këtij edicioni.
Mbrojtësi i qendrës, Dayot Upamecano, u përjashtua nga loja kundër Bochumit, dhe të shtunën nuk do të luajë kundër Leipzigut për shkak të suspendimit.
Eric Dier që u huazua nga Tottenhami muajin e kaluar, mund ta mbulojë krahun e djathtë.
Të lënduar janë edhe Alphonso Davies, Kingsley Coman dhe Serge Gnabry.