Formën e mirë që po e shfaq në Serie A, skuadra e Interit synon ta bartë edhe në Ligën e Kampionëve.
Interi në fazën nokaut të kësaj gare, do të ketë punë me skuadrën e Atletico Madridit. Ndeshja e parë e 1/8 së finales mes këtyre dy skuadrave, do të zhvillohet të martën prej orës 21:00 në stadiumin “Giuseppe Meazza” të qytetit të Milanos.
Bazuar në formën e treguar deri më tani këtë edicion, Interi mund të llogaritet favorit përball ekipit nga Spanja.
Interi i ka fituar katër ndeshjet e fundit në kampionatin italian, ndërsa Atletico ka dy fitore, një barazim dhe një humbje në La Liga.
Po ashtu, Interi muajin e shkuar e fitoi edhe Superkupën e Italisë. Skuadra e trajnerit Simone Inzaghi është edhe nënkampione në fuqi e Evropës, pasi në finalen e edicionit të shkuar u mposht nga Manchester City.
Inzaghi në konferencën për shtyp para duelit me Atleticon, ka insistuar se ekipi i tij edhe këtë edicion synon të paktën të arrij deri në finalen e Ligës së Kampionëve. Inzaghi ka vlerësuar lart edhe punën e homologut të tij, Diego Simeones tek Atletico. Simeone është në krye të Atleticos prej vitit 2011 dhe sukseset me këtë skuadër nuk i kanë munguar. Në fakt, Inzaghi dhe Simeone njihen me njëri tjetrin pasi kanë qenë bashkëlojtar te Lazio në vitin 2000 duke e fituar titullin dhe kupën e Italisë.
Të dyja skuadrat pritet të jenë të kompletuara për këtë përballje, pasi Atleticos i është rikthyer sulmuesi Alvaro Morata pas lëndimit. Të martën, në të njëjtën kohë, zhvillohet edhe një ndeshje tjetër e kësaj faze të Ligës së Kampionëve. Në Holandë, skuadra e PSV Eindhovenit e pret Borussia Dortmundin.
Dortmundi ka treguar paraqitje të mira këtë edicion, sidomos në Ligën e Kampionëve dhe shihet favorit për të avancuar në çerekfinale të garës më elitare të Evropës. Megjithatë, PSV Eindhoveni po marshon drejt titullit të kampionit në Holandë pasi prinë në tabelë me 62 pikë, dhjetë më shumë se përcjellësi më i afërt. Si Dortmundi ashtu edhe Eindhoveni, sipas të gjitha gjasave do t’i kenë ekipet e kompletuara për duelin e parë të 1/8 së finales.
