Gennaro Gattuso më nuk është trajner i Olympique Marseillet.
Mediumet franceze, kanë raportuar të hënën se Marseille e ka shkarkuar Gattuson për shkak të rezultateve të dobëta.
Shkarkimi i Gattusos ka ardhur pas humbjes 1:0 nga Bresti, të dielën. Në fakt, Marseille në pesë ndeshjet e fundit nuk ka marrë fitore, duke regjistruar tri barazime e dy humbje.
Po ashtu, në tri prej katër ndeshjeve të fundit, Marseille nuk e ka regjistruar asnjë gjuajtje të vetme në portë. Gattuso pati marrë drejtimin e Marseillet në shtator të vitit të shkuar, ndërsa më herët ka punuar edhe te Palermo, Pisa, Milani e Napoli.
