Kundër Rumanisë dhe në shtëpi, do të nis aventura e Kombëtares së Kosovës në futboll në Ligën e Kombeve.
Një ditë pas shortit të hedhur në Paris, ku “Dardanët” mësuan kundërshtarët për edicionin e katërt të Nations League, të premten është bërë i ditur orari i ndeshjeve të Kosovës, për garën që nis në fillim të shtatorit.
Ndeshja e parë e “Dardanëve” luhet më 6 shtator dhe atë si vendës kundër Rumanisë. Do të jetw kjo një mundësi e mirë e futbollistëve tanë, për t’i revanshuar rumunëve, që përveç fitores në Bukuresht, shpalosën pankartën me mesazh fashist, duke bërë që ndeshja të ndërpritej e të vazhdonte pas gati një ore.
Ndeshjen e dytë Kosova e luan vetëm tri ditë më vonë, më 9 shtator, kundër Qipros në udhëtim.
Më 12 tetor do ta zhvilloj një tjetër ndeshje në udhëtim, dhe për kundërshtar do ta ketë Gjibraltarin ose Lituaninë.
Më 15 tetor e pret Qipron, ndërsa dy ndeshjet e fundit të Grupit 2 Të Ligës C, do t’i ketë në nëntor.
Më 15 nëntor luan në udhëtim ndaj Rumanisë, derisa tri ditë më vonë e pret, Gjibraltarin ose Lituaninë.
Këto dy përfaqësuese do të përballen kundër njëra-tjetrës në plejaut. Fituesi pastaj do t’i bashkohet grupit.
Kosova me Rumaninë është përballë në dy ndeshjet kualifikuese për Euro 2024, ndërsa me Qipron ka luajtur në edicionin e kaluar të Ligës së Kombeve, duke fituar dy ndeshjet.
Si me Gjibraltarin apo Lituaninë, Kosova ka zhvilluar miqësore, duke i mposhtur që të dyja.
