Kryeministri i Republikës së Kosovës, Albin Kurti, dhe presidentin e Maqedonisë së Veriut, Stevo Pendarovski, kanë vlerësuar se raportet ndërmjet dy vendeve janë të mira dhe se bashkëpunimi do të rritet në fusha të ndryshme.
Kjo është thënë në takimin që ata kanë zhvilluar në Prishtinë, në vizitën zyrtare të Pendarovskit në Kosovë.
Sipas komunikatës së Qeverisë, kryeministri Kurti ka thënë se vendet kanë bashkëpunim të mirë.
“Dy vendet dhe shtetet tona i dëshirojnë më të mirën njëra-tjetrës dhe kanë komunikim dhe bashkëpunim të mirë si në aspekt institucional ashtu edhe në nivel të shoqërive tona”, u shpreh kryeministri Kurti në fillim të takimit, duke e falënderuar presidentin Pendarovski dhe Maqedoninë e Veriut për mbështetjen ndaj Kosovës në çështje të ndryshme me interes të përbashkët, veçanërisht në rrafshin ndërkombëtar përmes përkrahjes në anëtarësimin në organizata ndërkombëtare, thuhet nga Qeveria.
Në këtë takim bëhet e ditur se është diskutuar dhe për zhvillimet në rajon, situatën e sigurisë.
“U fol edhe për zhvillimet në rajon, procesin e dialogut të ndërmjetësuar nga Bashkimi Evropian dhe situatën e sigurisë pas sulmit terrorist dhe paramilitar të para katër muajve në Banjskë të komunës së Zveçanit. Me këtë rast, Kryeministri falënderoi presidentin Pendarovski për vendimin për Maqedoninë e Veriut për shtimin e kontingjentit të trupave të saj në kuadër të KFOR-it”, thuhet tutje.
Presidenti Pendarovski u shpreh mirënjohës për mikpritjen sot.
“Ai tha se Kosova dhe Maqedonia e Veriut përveç marrëdhënieve shumë të mira, kanë edhe të njëjta qëllime strategjike, dhe se ajo është e gatshme që të ndajë me Kosovën përvojat e saj sa i përket integrimit evropian dhe anëtarësimin në NATO”, ka thënë Pendarovski.
