Kryediplomatja e Kosovës, Donika Gërvalla ka falënderuar të gjithë personat që janë angazhuar që Spanja të njoh pasaportën e Kosovës.
Gërvalla këtë sukses ia ka atribuuar qeverisë aktuale, teksa ka thënë se priten ende lajme të mira, para festimit të 3 vjetorit të ardhjes në pushtet dhe 16-vjetorin e pavarësisë së Kosovës.
Ajo po ashtu, ka përmendur shtrirjen e sovranitetit siç ka thënë ajo në të gjithë vendin, fillimin e inkasimit të rrymës në veri të Kosovës, heqja e barrierave për qarkullimin me targat e Republikës së Kosovës edhe nëpër Serbi, dhe në fund ka përmendur edhe vizitën e kryediplomatit britanik dhe mesazhet që ai solli.
Postimi i plotë i saj:
Po e mbyllim edhe një ditë me krenari dhe me një lajm të mirë për Kosovën dhe qytetarët e saj.
Spanja i shtohet listës së shteteve, në të cilat qytetarët tanë mund të udhëtojnë lirshëm, me pasaportën e Republikës së Kosovës dhe pa viza. Për këtë falënderoj nga zemra të gjithë ata që janë angazhuar për arritjen e këtij suksesi.
Na mbetet të vazhdojmë, si çdo ditë gjatë këtyre dy viteve të mandatit tonë, punën intensive për të forcuar edhe më tej Republikën e Kosovës në arenën ndërkombëtare.
Liberalizimi i vizave, shtrirja e sovranitetit në të gjithë vendin, fillimi i inkasimit të rrymës në veri të Kosovës, heqja e barrierave për qarkullimin me targat e Republikës së Kosovës edhe nëpër Serbi si dhe mesazhet e qarta dhe të palëkundura të Mbretërisë së Bashkuar në përkrahje të sovranitetit, ekonomisë dhe sigurisë së Republikës së Kosovës, janë tregues të qartë të suksesit dhe përkushtimit të institucioneve të Republikës së Kosovës.
Do të kemi edhe më shumë lajmë të mira para se të festojmë 3-vjetorin e fitores së madhe të 14 shkurtit dhe 16-vjetorin e pavarësisë së Kosovës. Vetëm me vendosmëri dhe punë të ndershme dhe të palodhshme mund t’ia kthejmë Kosovës dinjitetin dhe t’ia sigurojmë vendin e merituar në familjen e kombeve.
