Sipas tij, veteran i luftës është ai që është angazhuar në Ushtrinë Çlirimtare të Kosovës deri në ditën e fundit të luftës, kurse tha se Kurti ka dhënë dorëheqje publikisht nga UÇK-ja në prill të vitit 1999, pra ende pa përfunduar lufta.
“Sipas ligjit të veteranëve të rrejshëm, pjesëtar i Ushtrisë Çlirimtare, pra kategoria më kryesore e veteranit të luftës, është ai që është angazhuar në Ushtrinë Çlirimtare të Kosovës deri në ditën e fundit të luftës, pra dita e fundit e luftës është në Qershor, dhe zotri Kurti dihet publikisht që ka dhënë dorëheqje nga UÇK-ja në prill të vitit 1999, pra ende pa përfunduar lufta ai praktikisht ka dhënë dorëheqje, dhe në letrën e dorëheqjes së bashku me Zyrën e Përfaqësimit politik në atë kohë të udhëhequr nga zotri Demaçi, ata tregojnë që janë kundër veprimeve të Shtabit të Përgjithshëm të UÇK-së, praktikisht kundër nënshkrimit të marrëveshjes së Rambujes, dhe për rrjedhojë nuk mund të jesh pjesëtar, veteran dhe luftëtar i UÇK-së, nëse nuk je deri në ditën e fundit, dhe Kurti nuk ka qenë”, deklaroi Nushi.
Ai u shpreh se Kurti po zhvillon kauzë ndaj veteranëve të rrejshëm, për shkak së dëshiron ta rrisë pagën minimale në Kosovë, por jo pensionin e veteranëve. Sipas tij, Kurti është dashur të mos stisë kauzë ligjore kundër tyre, për shkak se vetë është një veteran i rrejshëm.
“Problemi i Kurtit është që megjithatë ka mbushur aplikacionin, aty është data e fillimit dhe e mbarimit të angazhimit tënd, dhe sipas saj ai është dashur që të deklarojë ndryshe e jo ashtu siç ka bërë. Këtë e kemi bërë pikërisht për të kthyer vëmendjen në luftën që Kurti po zhvillon kauzë kinse ndaj veteranëve të rrejshëm, ai këtë është duke e bërë për shkak se dëshiron ta rrisë pagën minimale në Kosovë, mirëpo dëshiron ta shkëpusë ndërlidhjen ligjore e cila është mes pagës minimale dhe pensionit të veteranëve, pra ai dëshiron që të rritet vetëm paga minimale dhe të mos rritet pensioni i veteranëve, dhe në këtë mënyrë ai po e stisë një kauzë ligjore kinse kundër veteranëve të rrejshëm, përderisa vetë është një i tillë. Ai është dashur të mos aplikojë fare si i tillë, por pasi që e ka bërë dhe pasi që e ka parë që ajo që ka vepruar është gabim, është dashur të dalë vetë të tërhiqet dhe kështu mund të jipte një shembull, mirëpo siç e dini ai nuk pranon që ka bërë gabime”, u shpreh ai.
