Më 18 mars 2023, kryeministri Albin Kurti dhe presidenti i Serbisë, Aleksandër Vuçiq, arritën një marrëveshje në të cilën thuhej se duhet të zbatohet deri në janar 2024
Por e njëjta, ende nuk po gjen zbatim nga palët.
Deputeti i pavarur, Haki Abazi, thotë për Teve1 se, kryeministri Kurti do të tenton t’i ikë marrëveshjes me Serbinë duke e dërguar vendin në zgjedhjet të parakohshme.
“Ne jemi në një kurth të madhe që do të vazhdon edhe në vitin 2024, potencialisht mund të shohim tentimin e Kurtit që të realizojë qëllimin e tij që të shkohet drejt në zgjedhje që në një formë do të duket blerje e kohës por faktikisht është degradim i mëtutjeshëm i demokracisë në vend, sepse nuk as vullnet politik e as mekanizma të ndërtuar për llogaridhënie për agjendën tonë integruese dhe zhvillimet e brendshme”, thotë Abazi.
E analisti, Dritero Arifi, mendon se faktori ndërkombëtar, në fillim vitin 2024, do të shton presion ndaj dy vendeve për zbatimin e të gjitha marrëveshjeve.
“Duhet të shihet në dy faza, faza e parë është se palët janë marrë vesh për marrëveshjen franko-gjermane, dhe për aneksin e Ohrit. Mandej palët gjatë rrugës kanë devijuar këto marrëveshje. Sidoqoftë palët janë zotuar para ndërkombëtarëve para BE-së, dhe para fuqive të mëdha të BE-së se do të zbatojnë marrëveshjen franko- gjermane. Dhe këtë vit nuk pres ndonjë dialog intensiv, por ajo çfarë pres, është se do të ketë presion të madh të dyja palët që ta respektojnë dhe ta zbatojnë marrëveshjen”, thotë Arifi.
Ndryshe mendon, Gazmir Raci, sipas tij, deri në qershor, pritet të ketë një marrëveshje Kosovë-Serbi.
“Për arsyeje se në qershor janë zgjedhjet për parlamentin evropian, dhe në fundvit janë gjithashtu zgjedhjet në Shtetet e Bashkuara të Amerikës, unë pres një angazhim më të shtuar të faktorit ndërkombëtar këto ditë ose këtë javë, për ta drejtuar këtë fazë drejt finalizimit sa më shpejt që të jetë e mundur”, thotë Raci.
Në dhjetor 2023, kryeministri Albin Kurti ka renditur 7 pika plani për qeverisjen 2024, duke vënë në prioritet Sigurinë në vend, e në pikën e pestë, dialogun Kosovë –Serbi, në të cilën thuhet se është i gatshëm për nënshkrimin e draft statutit të Asociacionit të Komunave me Shumicë serbe.
Kronika e realizuar nga gazetari Venhar Isufi
