Skuadra e Barcelonës nuk mund të përballojë më të paguajë shuma të majme në tarifat e transferimit për lojtarët si norvegjezi Erling Haaland dhe francezi Kylian Mbappe. Një fakt të tillë e ka pranuar edhe trajneri i Barcelonës, Xavi Hernandez, të enjten, në një intervistë për mediumet spanjolle. Barcelona shpenzoi mbi 100 milionë euro në tarifa për të transferuar Philippe Coutinhon, Antoine Griezmannin dhe Ousmane Dembelen mes vitit 2017 dhe 2019. Mirëpo, çështjet financiare të klubit nënkuptojnë se Barcelona nuk ka gjasa të mburret me transferime të reja të mëdha së shpejti.
Sipas Xavit, do të nevojitet një kohë që Barça ta rimarrë veten, përpara se të bëjë lëvizje të tilla në ndonjërin prej afateve kalimtare – të dimrit apo verës.
Xavi ka thënë se ai shpreson që klubi të bëjë ndonjë transferim gjatë këtij muaji, por ka shuar shpresat e tifozëve kur ka thënë se Barcelona nuk mund të shkojë pas futbollistëve me nam, si Haalandi i Manchester Cityt dhe Mbappe i Paris Saint-Germainit. Ai pret që Barça në këtë afat kalimtar të bëjë ndonjë lëvizje të profilit të ulët apo edhe të huazojë ndonjë lojtar deri në fund të edicionit dhe kjo për shkak të telasheve financiare.
“Fatkeqësisht, ne nuk jemi në një situatë të privilegjuar ekonomikisht për të bërë transferime të mëdha apo të lojtarëve si Haaland e Mbappe.
Unë kam mbetur me lojtarët që kam në dispozicion dhe me këto duhet të fitojmë. Shpresoj të bëjmë ndonjë lëvizje gjatë këtij muaji për ta kompletuar edhe më shumë ekipin, por sigurisht se nuk presim ndonjë emër të madh”, ka pranuar Xavi. “Për ne është e rëndësishme të fitojmë trofe dhe të luajmë mirë, pasi vetëm në këtë mënyrë mund ta ngremë nivelin tonë të lojës”.
Për dallim prej Haalandit, i cili nuk ka paralajmëruar largimin nga City, sulmuesi i Francës, Mbappe, ende nuk ka marrë një vendim të prerë për të ardhmen e tij. Mbappe është i lirë të negociojë me skuadrat e tjera që nga fillimi i këtij muaji pasi kontrata me Parisin i skadon në fund të këtij edicioni. Në rast se nuk rinovon kontratën me PSG-në, atëherë Mbappe në verë do të jetë futbollist i lirë. Skuadra më e favorizuar për ta transferuar falas mbetet Real Madridi, ndonëse interesim për Mbappen ka shfaqur edhe Liverpooli. Haaland prej vitit 2022 është pjesë e Cityt dhe ka kontratë deri në verën e vitit 2027 me kampionin në fuqi të Anglisë. Edhe këtë edicion Haaland ka treguar paraqitje të mira për Cityn, ku ka shënuar 19 gola në 22 ndeshje të luajtura në të gjitha garat. Ndërkohë Mbappe ka 22 gola të realizuar në 22 paraqitje për PSG-në.
