Kryeministri, Albin Kurti së bashku me kryediplomaten, Donika Gërvalla, 1 janarin e nisën në aeroportin ndërkombëtar “Adem Jashari” në Prishtinë. Kjo për t’i përshëndetur 50 kosovarët e parë që udhëtuan pa viza drejt Evropës. Kurti tha se po hiqet një padrejtësi e madhe ndërsa Gërvalla theksoi se pritjeve të gjata para ambasadave të huaja iu erdhi fundi.
Janë orët e para të vitit të ri.
Por, mëngjesi i 1 janarit, shumë udhëtarë i gjeti në aeroportin ndërkombëtarë të Prishtinës.
Janë këta 50 kosovarët e parë që pa viza, po e lënë Kosovën.
Për këtë, edhe në aeroportin “Adem Jashari” janë bërë përgatitjet e duhura.
Për t’i uruar, në aeroport doli edhe i pari i vendit, Albin Kurti.
Ky i fundit tha se 50 qytetarët, e fituan këtë mundësi nga fushata informuese e Qeverisë së Kosovës për liberalizimin e vizave.
“Për të shënuar këtë arritje të rëndësishme sot do të udhëtojnë për në Vjenë, 50-të qytetarë të cilët fituan këtë mundësi në kuadër të fushatës tonë informuese. Këtë të drejtë të fituar me vështirësi duhet ta gëzojmë me përgjegjësi, të respektojmë kërkesat e kriteret, sepse kështu vlerësojmë dhe lartësojmë shtetit tonë. Kudo që të udhëtojmë të kujtojmë e kurrë mos të harrojmë që shtëpia jonë është Kosova jonë e dashur”, u shpreh kryeministri i Kosovws, Albin Kurti.
Kurti tha se 1 janari, shënon një datë të rëndësishme në historinë e vendit.
“Kjo ditë është një ditë e rëndësishme, po hiqet një padrejtësi e madhe, e po fitohet një e drejtë e rëndësishme, e drejta e udhëtimit pa viza në Zonën Schengen. E bashkë me të po forcohet edhe pasaporta e Republikës së Kosovës, më të cilën qytetaret tanë do të mund të udhëtojnë pa viza në 32 vende më shumë. Forcimi i dokumenteve tona të udhëtimit krahas përfitimeve të përditshme është forcim i dinjitetit tonë si shtet në arenën ndërkombëtare”, u shpreh Kurti.
Ndërkohë kryedipolomatja, Donika Gërvalla, tha se morën fund pritjet e gjata para ambasadave të huaja në Kosovë.
“Sot vërtet është një ditë e mirë, e gëzuar sepse secili prej nesh e din se sa kohë kemi humbur në pritje të gjata para ambasadave. Sa kohë është humbur edhe në mërgatë duke siguruar ftesa, fletëgarancione dhe burokraci të tjera. E dini mirë se sa para janë shpenzuar pa nevojë për viza dhe procedura. E dini se sa jo dinjitoze kanë qenë pritjet në rruge, në shi, në borë dhe në diell. Ato kanë marr fund me ditën e sotme”, deklaroi ministrja e Jashtme, Donika Gwrvalla.
Ndryshe, liberalizimi i vizave u mundëson qytetarëve të Kosovës, që kanë pasaporta biometrike, të qëndrojnë deri në 90 ditë – brenda gjashtë muajsh – në cilindo nga 27 shtetet anëtare të zonës Schengen.
