U akuzua për një vrasje. Për këtë mbajti afër 3 vjet burgim e më pas u vërtetua pafajësia e tij.
Lumni Limaj që nga viti 2004 nuk ka marrë dëmshpërblimin, e që sipas tij i takojnë rreth 9000 euro.
Avokati i çështjes në atë kohë, tashmë ka ndërruar jetë dhe paratë kanë mbetur në bankë. Limaj thotë se ka qenë në Gjykatë, ku i është premtuar se shumë shpejt do të mbahet seanca për këtë çështje.
Megjithatë ai ka vetëm një kërkesë.
“Unë veç po du me mi lshu paratë e mia se e kom meritu se i kom mbajt tri vjet burg se plotësisht jom leshu i pafajshëm dhe veç paret e mia po kërkoj me mi leshu nga shteti i Kosovës që i ka blloku ne bankë, kurgjo tjetër nuk du”.
Në lidhje me këtë, avokati i tanishëm, Hazer Susuri thotë se paratë kanë mbetur në llogarinë e ish-avokatit dhe banka kërkon trashëgimtarin e të ndjerit për t’i bartur paratë.
“Lidhur me trashëgiminë e të ndjerit Durak Jashari assesi nuk po mundet të lëshohet akti i vdekjes i të ndjeri për trashëgimtarët ngase i njëjti nuk i ka paraqitur/regjistruar trashëgimtarët, disa i ka në SHBA, i biri dhe bashkëshortja e tij dhe dy vajzat në Prishtinë, tjetra në Gjermani si dhe ish bashkëshortja në Prishtinë”.
Susuri thotë se prezenca e familjarëve të tij nuk mund të sigurohet pasi gjenden në adresa të panjohura.
Edhe Astrit Hoti nga Këshilli Gjyqësor thonë se kompensimi ka ndodhur në afatin e paraparë ligjor.
“Ju informoj se procedurat e kompensimit të dëmit ndaj z.Lumni Limaj ka përfunduar në afatin e paraparë ligjor dhe mjetet i janë bartur sipas autorizimit të avokatit të tij”.
Televizioni ka tentuar të marrë edhe një përgjigje nga banka ku është bërë transferi, mirëpo të njëjtit nuk kanë pranuar të prononcohen.
Kronikë e realizuar nga gazetarja, Rinesa Osmanaj.