Këshilli Gjyqësor i Kosovës (KGJK) në takimin e 318-të, të mbajtur të enjten ka miratuar disa akte nënligjore, duke përfshirë shtatë rregullore, dy udhëzime administrative dhe një Plan Strategjik.
Fillimisht takimi i 318-të i KGJK-së ka filluar me prezantimin e anëtarit të ri të KGJK-së, gjyqtarit Artan Abazi, raporton “Betimi për Drejtësi”.
Para miratimit të akteve të lartcekura, prezantimi i tyre është bërë nga kryetarja e Komisionit për Çështje Normative, gjyqtarja Drita Rexhaj.
Pas prezantimit nga anëtarja Rexhaj, anëtarët e Këshillit kanë miratuar këto rregullore:
Rregulloren për Përdorimin e Sistemit për Menaxhimin Informativ të Lëndëve (SMIL)
Rregulloren për Punën e Panelit për Lirim me Kusht
Rregulloren për Sistemin për Menaxhimin e Dosjes Elektronike të Gjyqtarëve
Rregulloren për Përdorimin e Sistemit për Menaxhimin e Dosjes Elektronike të Administratës Gjyqësore
Rregulloren për Statusin, Kushtet dhe Procedurën e Emërimit të Panelit Zgjedhor për Ankesa dhe Parashtresa
Rregulloren për Trajnimin e Gjyqtarëve
Rregulloren për Trajnimin e të Punësuarve në Administratën e Sistemit Gjyqësor
Për disa nga rregulloret e lartcekura ka pasur diskutime mes anëtarëve të Këshillit, një nga to ka qenë edhe Rregullorja për Trajnimin e Gjyqtarëve.
Për këtë Rregullore është propozuar që të shtohet një dispozitë që varësisht nga nevojat e Akademisë së Drejtësisë të rritet edhe numri i orëve të trajnuesve.
Nga anëtarët e Këshillit është theksuar se puna primare e gjyqtarit është puna e gjyqtarit dhe jo e trajnuesit në Akademinë e Drejtësisë, prandaj sipas tyre me këtë rregullore është ulur numri i orëve të trajnuesve që do të shërbejnë në Akademinë e Drejtësisë.
Tutje, Këshilli ka miratuar edhe Planin Strategjik të Teknologjisë Informative të KGJK-së 2024 – 2029. Lidhur me këtë plan, anëtarja Rexha tha se qëllimi kryesor është që të iu mundësohet gjykatave të i punojnë lëndët gjyqësore në mënyrë digjitale dhe të kontribuohet në zvogëlimin e kohës së vendimmarrjes.
Tutje, anëtarët e Këshillit kanë miratuar edhe Udhëzimin Administrativ për Procedurat e Përdorimit dhe Menaxhimit të Parave të Imëta për Gjykata dhe Njësitë e Këshillit Gjyqësor të Kosovës dhe Udhëzimin Administrativ për Pranimin dhe Menaxhimin e të Hyrave dhe Depozitave Gjyqësore.
Për shkak të pikave të shumta në rend të ditës, ky takim është caktuar të vazhdojë me 27 dhjetor 2023. /BetimipërDrejtësi