Analisti politik, Fidan Ukaj, thotë se do të ketë trysni nga ana e Bashkimit Evropian dhe Shteteve të Bashkuara të Amerikës sa i përket përfundimit të procesit të dialogut Kosovë – Serbi, kjo pas përfundimit të zgjedhjeve në Serbi, që do të mbahen më 17 dhjetor.
Ukaj thotë se pas zgjedhjeve varësisht se kush fiton atje, do të ketë një normalizim më të madh të raporteve mes të dyja palëve.
“Pas datës 17 dhjetor mbetet të shihet se kush do të fitojë në Serbi, do të fitojë Vuçiq apo opozita. Mendoj se futja e kapitullit në rrugën e Serbisë në Bashkimin Evropian dhe zbatimi i marrëveshjes së aneksit të Ohrit dhe marrëveshjes së Brukselit, po ashtu do të ketë trysni më të madhe nga ana e Bashkimit Evropian dhe ShBA-së. Mendoj se po, do të fillojë zbatimi i marrëveshjes dhe do të ketë një normalizim më të madh të raporteve”, tha ai në emisionin “Ditari” në Tëvë1.
Analisti politik është shprehur skeptik për rrugën e Kosovës në anëtarësimin në mekanizma ndërkombëtarë, pasi që sheh pengesa të vazhdueshme nga ana e Serbisë.
“Jam skeptik për rrugën e Kosovës për anëtarësim në mekanizma ndërkombëtarë. Për arsye që Serbia në vazhdimësi nuk e ka ndaluar luftës e saj dhe pse është zotuar se nuk do ta pengojë rrugën e Kosovës për anëtarësim. Megjithatë, unë jam skeptik se lufta e Serbisë për ta penalizuar ose për ta ndaluar luftën e Kosovës për anëtarësim do të jetë e vazhdueshme”, shtoi ai./teve1.info/
