Sindikata e Zjarrfikësve të Kosovës, sot ka protestuar para Qeverisë së Kosovës, si shenjë pakënaqësie me kushtet e punës dhe gjendjen në përgjithësi.
Njëri nga zjarrfikësit e pakënaqur, tha se nga kushtet e punës që kanë, detyrohet të ha bukë e qepë, teksa shtoi që Qeveria aktuale, më herët u ka premtuar “parajsë” në Kosovë.
“Qikaq i kemi kushtet, bukë, qepë e krip, por kripa mungon sot. Me tregu drejtë, krip të Shqipërisë s’kish pasë, e të Serbisë nuk deshta me e ble. Çkado që nuk prodhohet në Shqipëri, nuk e llogaris prodhim vendor. Ata le të rrinë atje brenda, e ne rrimë në shi s’ka problem. Nga muaji janar edhe pak ditë kanë mbetur, e pastaj le të punojnë këta zjarrfikës vetë. Jo more, s’shkon kështu, bukë e qepë edhe pa zjarrfikës i bëj. Na patën premtuar parajsë në Kosovë”, u shpreh kështu ai.
Po ashtu, ky i fundit ka përmendur edhe Policinë e Kosovës, e që sipas tij, kushtet e tyre të punës janë pothuajse të njëjta.
“Nëse duan ta shohin veten se si po menaxhojnë, jam unë këtu dhe kolegët e mi policë që po lagen në shi, se kushtet i kemi përafërsisht të njëjta. S’po kemi qare pa protestu, na e kanë pru thikën në fyt”, shtoi tutje ai.
“Duam të drejtat tona, o Albin ti ku je”, dëgjoheshin brohoritjet e protestuesve.
Protesta ka qenë paqësore nga parkingu i pallatit të Rinisë duke defiluar këmbë sheshit “Zahir Pajaziti” deri te objekti i Qeverisë së Kosovës./teve1.info/.
