Pas publikimit të rezultateve të testit PISA, deputetja e Lidhjes Demokratike të Kosovës (LDK), Hykmete Bajrami thotë se tani është koha e fundit që arsimi në vend të bëhet prioritet kombëtar.
Sipas saj, rezultatet e PISA-s është dashur të jenë një këmbanë për Qeverinë, raporton teve1.info
“Rezultatet e PISA-s është dashur që të jenë një këmbanë dhe një shqetësim i jashtëzakonshëm për Qeverinë…është koha e fundit që arsimi në Kosovë të bëhet prioritet kombëtar. Është koha e fundit që Kosova të merret seriozisht me riorganizimin e rrjetit të shkollave. Për rreth 13 vite në Kosovë, numri i nxënësve ka ra për 100 mijë, ndërkohë që ne ende vazhdojmë të ndërtojmë shkolla në disa zona rurale dhe kemi mungesë të klasave dhe shkollave në zona urbane”, deklaroi ajo në Kuvend.
Ajo i bëri këto komente gjatë seancës që po mbahet në Kuvend, ku në rend dite është votimi i shqyrtimit të dytë të buxhetit për vitin 2024. Sipas saj, duhet të ketë një rialokim të buxhetit dhe një “taskforcë e cila merret seriozisht me reformën në arsim”.
Deputetja Bajrami potencoi se shumë shkolla nuk i përmbushin kushtet për të mbajtur mësim, dhe siç tha ajo, ende nuk është marrë ndonjë hap për riorganizimin e rrjetit të shkollave.
“Sipas të dhënave të Ministrisë së Arsimit, 33% të shkollave në Kosovë dhe 77% të paraleleve nuk i përmbushin kushtet për të mbajtur mësim sipas kritereve ligjore…dhe çka ka ndodhur, nuk ka asnjë hap të vetëm për riorganizimin e rrjetit të shkollave. Për më tepër, ministrja e cila udhëheq tash e 32 muaj me Ministrinë e Arsimit, ajo ka filluar mandatin duke e ndërprerë një formë të riorganizimit të rrjetit të shkollave në Kamenicë, vetëm për qëllime elekotrale”, shtoi deputetja e LDK-së. /Teve1.info/
