Presidentja e Kosovës, Vjosa Osmani iu ka shprehur ngushëllime familjes, miqve dhe komunitetit kulturor për ndarjen nga jeta të aktorit Mirush Kabashi.
Osmani ka thënë se Kabashi ishte ikonë e kinematografisë shqiptare. Ndërsa, shtoi se Mirush Kabashi ishte zëri artistik edhe i Kosovës.
Mirush Kabashi ishte lindur më 17 prill 1948 në Shkodër por me origjinë nga Gjakova.
Ngushëllimi i plotë i Presidentes Osmani:
Sot, kinematografia shqiptare mbeti pa aktorin e madh, ikonën Mirush Kabashi.
Ai kombinoi për mrekulli karizmin, mjeshtërinë dhe përkushtimin, duke prekur thelbin e emocioneve njerëzore me një finesë të pashembullt dhe duke lënë gjurmë të pashlyeshme në krijimtarinë
kinematografike.
Secila paraqitje e tij ishte mishërim i angazhimit pasionant dhe të palëkundur ndaj artit.
Ai ishte zëri artistik edhe i Kosovës me vargjet kushtuar sakrificës dhe luftës për liri e pavarësi.
Trashëgimia nga magjia skenike e paraqitjeve të tij do të jetë kujtesë e jona e përhershme!
Ju përcjell ngushëllimet e mia më të sinqerta familjes, miqve dhe komunitetit kulturor!
I përhershëm qoftë kujtimi për Mirush Kabashin!
