Shefi i Grupit Parlamentar të Partisë Demokratike të Kosovës, Abelard Tahiri, pas mbledhjes së Kryesisë së Kuvendit, ka thënë se mazhoranca duhet të reflektojë karshi disa kërkesave, sa i përket buxhetit.
Gjatë deklarimit për media, Tahiri ka vlerësuar që duhet të ketë reflektim ndaj kërkesave të policisë, zjarrfikësve dhe veteranëve.
“Sa i përket buxhetit, si Grup Parlamentar i Partisë Demokratike të Kosovës i kërkojmë mazhorancës që të reflektojë karshi kërkesave të Policisë së Kosovës, karshi kërkesave të zjarrfikësve, karshi kërkesave të disa kategorive sociale të cilat janë jashtëzakonisht të rëndësishme, karshi kërkesave të veteranëve, që të plotësohen ato dhe të amandamentohet buxheti, tash pra ku janë amandamentet në komision, që do të vije në lexim të dytë, të plotësohen këto kërkesa”, është shprehur ai.
Po ashtu, Tahiri ka thënë se seancat e radhës së Kuvendit të Kosovës do të mbahen pas dy jave, atëherë kur do të jetë shqyrtimi i buxhetit për vitin 2024.
“Kryesia e Kuvendit nuk kishte kuorum që të marrim vendim sot. Javën tjetër nuk do të kemi seanca për shkak të udhëtimeve të shumë deputetëve, seancat e radhës do të mbahen pas dy jave, kur do ta kemi për shqyrtim buxhetin e për Republikën e Kosovës, për vitin 2024”, shtoi tutje Tahiri./teve1.info/.
