Deputeti i AAK-së, Besnik Tahiri, tha se raporti i Progresit për Kosovën ia ka dhënë një diagnozë qeverisjes së Albin Kurtit në raport me integrimin evropian, e cila sipas tij është e regresit, politizimit, dështimit dhe e paaftësisë për të qeverisur, raporton teve1.info
Tahiri këto deklarime i bëri në debatin parlamentar për Raportin për vendin për vitin 2024 i cili u publikua para disa ditëve nga BE.
“Ky raport ta ka dhënë një diagnozë qeverisë që ju e udhëhiqni që qeveria në raport me procesin e integrimit është qeveri e regresit, e politizimit, e dështimit dhe paaftësisë për të qeverisur”, tha Tahiri.
Ai po ashtu tha se në raport nga 205 herë sa është përdor fjala progres, vetëm në tetë herë është thënë se ka progres të mirë.
“Vlerësimi që BE ia ka dhënë Kosovës për këtë vit të qeverisjes është vlerësimi më i dobët, më i ashpër, e me fjalët më të rrepta që ndonjëherë kjo qeverie e ka marrë. Kur ka ardhur në pushtet Kurti pat dhënë fjalë shumë të mëdha për integrimin evropian dhe agjendën evropiane. Bile bile e pat vendos në ballë të kësaj platforme zëvendëskryeministrin e parë Besnik Bislimin dhe ndoshta nuk ju kujtohet, në atë kohë i kam adresuar kryeministrit i kam thënë që i ke dhënë shumë detyra Bislimit. Integrimin evropian nuk është sektor e as detyrë që duhet me pas një njeri, një zv. kryeministër që i ka edhe dhjetë punë tjera. Zv kryeministri i parë e ka edhe detyrën më të rëndë që merret me dialogun. Për rrjedhojë ky proces që në start është parë që nuk është mirë dhe nuk është për mua befasi që sot e kemi këtë raport. Nga një analizë e AAK-së shihet që ky vlerësim tregon për probleme serioze që ka ky shtet. Fjala progres në këtë raport është përdor 205 herë. 32 herë se ka mungesë të progresit, 49 herë ka progres të mangët, 59 herë ka njëfarë progresi, 42 herë është bërë progres, 15 herë në aspekte tjera dhe vetëm 8 herë se ka progres të mirë”, u shpreh Tahiri.