Proton Cable Prizreni ka thelluar krizën e Pejës në kampionat, duke ia shkaktuar humbjen e tretë rresht. Të mërkurën, në palestrën “Karagaçi” në Pejë, Prizreni e fitoi ndeshjen e mbetur të xhiros së nëntë të Superligës së Kosovës në basketboll me shifrat 108:103. Në fakt, Prizreni fitoi pas vazhdimit prej pesë minutave, pasi pas katër çerekëve ndeshja përfundoi 92:92. Për Prizrenin, kjo është vetëm fitorja e tretë këtë edicion, ndërsa Peja pësoi disfatën e tretë rresht. Para Prizrenit, Peja u mposht edhe nga Trepça e Vëllaznimit dhe ka 17 pikë të tubuara pas dhjetë ndeshjeve të luajtura.
Dueli në palestrën “Karagaçi” ishte dramatik prej fillimit deri në fund. Prizreni e fitoi çerekun e parë 27:21, përpara se Peja të kundërpërgjigjet në dy periudhat tjera. Çerekun e dytë, Peja e fitoi 25:18, ndërsa te tretin me shifrat 25:23 dhe në dhjetë minutat e fundit u fut me tri pikë epërsi (71:68). Çereku I fundit ishte tejet interesant, me Prizrenin që ishte në epërsi deri në sekondat e fundit të ndeshjes, por pikët e shënuara nga Justin Edler-Davis e dërguan ndeshjen në vazhdime. Në pesë minutat e vazhdimeve, Prizreni ishte më efikas duke i përfunduar me rezultatin 16:11 për ta fituar ndeshjen.
Ty Cockfield ishte i jashtëzakonshëm dhe më i merituari për fitoren e Prizrenit. Ai ndeshjen e mbylli me 34 pikë, 10 kërcime e 9 asistime. Me lojë të mirë u veçuan edhe Desi Sills e Isiah Kelly me nga 17 pikë secili, ndërsa Musab Mala pati 20 pikë. Te Peja, Jay Jay Chandler pati 28 pikë, i ndjekur nga Justin Davis (27) dhe Urald King (22), por që nuk mjaftuan për ta evituar humbjen
