Ish Komandanti i Forcave të Sigurisë së Kosovës, Kadri Kastrati, ka thënë se buxheti prej 153 milionë eurove për vitin e ardhshëm i paraparë nga Qeveria për FSK-në nuk është i mjaftueshëm për zbatimin e planit zhvillimor dhjetëvjeçar të paraparë në vitin 2014, raporton teve1.info
Kastrati në emisionin “Ditari” në Tëvë1, tha se duke i parë zhvillimet globale, Kosova do të duhej të ndaj buxhet shtesë për FSK-në derisa ka thënë se kësaj force i duhet edhe rritja e pagave.
“Duke marrë parasysh sfidat globale mendoj që Qeveria duket të jep buxhet shtesë sepse 1.5 për qind e bruto-produktit mendoj që nuk mjafton sepse nevojat janë të shumta siç është rritja e pagave në të gjitha nivelet sepse 570 euro sa i merr një kategori nuk mjafton për t’i kryer obligimet familjare, nevojat e veta dhe në këtë drejtim duhet shumë më tepër të ketë Qeveria fokus. Sa i përket trajnimeve, ushtrimeve, shkollimeve, unë çdo herë jam krenuar me këta pjesëtarë dhe çdo herë na kanë gazuar kur janë kthyer me medalje. Rritja e buxhetit është rritje e konsiderueshme nga 103 milionë në 153 për vitin e ardhshëm mirëpo sa unë jam i informuar këtu nuk parashihet rritja e pagave, nuk parashihet rritja e investimeve në projekte kapitale dhe kjo do të jetë një hendikep i madh. Vitin e ardhshëm planifikohet që të ketë rritje 1400 ushtarë dhe nëse e llogarisim sa do të jetë investimi në veshmbathje, armë personale, infrastrukturë, pajisje individuale besoj që nuk do të jetë i mjaftueshëm për të arritur edhe më shpejt planin 10 vjeçar zhvillimor i cili është paraparë në vitin 2014”, tha Kastrati.
Ish komandanti Kastrati përmendi edhe punën që sipas tij e ka bërë ish-ministri i FSK-së, Armend Mehaj, gjë që sipas tij i ka tejkaluar barrierat e mundshme të realizimit të tranzicionit të FSK-së nga gjysmë ushtri në ushtri e paraparë me ligjet për tranzicion në Kuvendin e Kosovës.
“Mehaj iu ka ikë të gjitha pengesave duke bërë kontrata qeveri-qeveri me SHBA, Turqi, Gjermani etj. dhe bazuar në këto marrëveshje pres që ministri aktual Ejup Maqedonci do të vazhdoj me këtë trend të lidhjes së kontratave qeveri-qeveri dhe në këtë drejtim mendoj që FSK ka ecë me hapa të sigurt, hapa të mirë duke bërë përzgjedhjen e armatimeve, me ushtri standarde të NATOS dhe në këtë drejtim mendoj që ne jemi mirë”, tha Kastrati.