Kuvendi i Kosovës në seancën e së enjten në rend dite do ta ketë edhe votimin në leximin e dytë të projektligjit për Fondin Sovran.
Kjo është bërë e ditur të hënën pas mbledhjes së Kryesisë së Kuvendit.
Por, ky projektligj nuk do ta ketë votën e dy partive opozitare, Partisë Demokratike të Kosovës dhe Aleancës së Ardhmërisë së Kosovës, zyrtarë të cilave janë deklaruar pas mbledhjes.
Shefi i Grupit Paralamnetar të PDK, Abelard Tahiri, tha se një strukturë ekonomike në bazë të ligjeve aktuale nuk mund të vendoset.
Ai u shpreh i bindur se ky ligj do të rrëzohet nga Gjykata Kushtetuese.
“Është e pamundur të vendoset një strukturë e tillë sipas rendit tonë Kushtetues. Jemi të bindur se kjo strukturë mund të ndërtohet vetëm me ndryshime Kushtetuese dhe jemi të bindur se Gjykata Kushtetuese do ta rrëzojë”, tha Tahiri përcjell teve1.info
Kundër këtij projektligjit të Fondit Sovran është shprehur edhe AAK-ja.
Besnik Tahiri, Shef i Grupit Parlamentar të kësaj partie tha kjo çështje do të adresohet edhe në instancat më të larta kushtetuese.
“Fondi Sovran është një ligj i cili e dëmton në esencë funksionimin e çfarëdo logjike ekonomike në këtë vend. AAK do ta kundërshton, është ligj kundërkushtetues i cili do ta adresohet në instancat më të larta kushtetuese”, tha ai.
Kundërshtime për projektligjin e Fondit Sovran ka dhënë edhe LDK-ja.
Në seancën e së enjten do diskutohet edhe për të gjeturat e raportit të Komisionin Evropian, pikë kjo që nuk arriti të diskutohet në seancën e fundit.
Fondi Sovran është shuma e mjeteve monetare që krijon Qeveria për qëllime të investimeve. Këto mjete monetare zakonisht mblidhen nga surpluset e rezervave, nga shitja e resurseve natyrore, nga privatizimet etj. Diçka e tillë ekziston në Norvegji, në Singapor, në Kuvajt etj.
Qeveria e Kosovës ka miratuar Fondin Sovran më 7 qershor të këtij viti./teve1.info/