Skuadra e Bashkimit i është hakmarrë Istogut për humbjen e shkaktuar në fillim të këtij edicioni. Bashkimi, të shtunën mbrëma ka triumfuar bindshëm ndaj Istogut në ndeshjen e xhiros së dhjetë të Superligës së Kosovës në basketboll. Dueli i luajtur në palestrën “Sezai Surroi” në Prizren, ka përfunduar me shifrat 93:53 në të mirë të ekipit vendas.
Për Bashkimin, kjo është fitorja e parë pas një serie prej pesë humbjeve rresht. Ndërkohë, Istogu regjistroi humbjen e nëntë karshi një fitoreje, të cilën e ka arritur ndaj Bashkimit në xhiron e tretë.
Bashkimi gjatë tërë ndeshjes ishte më i mirë se Istogu, i cili për asnjë moment nuk ia rrezikoi fitoren.
Vendasit i fituan të gjithë çerekët, ndërsa në të fundit triumfuan me shifrat 28:4 për ta bërë dallimin e madh në rezultat dhe fituar ndeshjen me 40 pikë dallim.
Pesë basketbollistë te Bashkimi e përfunduan ndeshjen me pikë dyshifrore. Grant Lozoya me 20 pikë, 13 kërcime e 9 asistime ishte më i dalluari, ndërsa në këtë triumf kontribuan edhe Isiah Umipig (17), Eduard Hazners (14) dhe Eric Copes e Samir Zekiqi me nga 12 pikë të realizuara secili.
Në anën tjetër, tek Istogu, vetëm amerikani Tyres Price pati 16 pikë të realizuara dhe ishte i vetmi me pikë dyshifrore.