Ministri i Bujqësisë Faton Peci është pritur sot në takim në Tiranë nga homologia e tij shqiptare Anila Denaj, me të cilën ka biseduar mbi çështje me interes të përbashkët në sektorin e bujqësisë së të dyja shteteve.
Peci gjatë këtij takimi tha se mbeten të përkushtuar për krijimin e lehtësirave për prodhuesit e përpunuesit, gjetjen e zgjidhjes së përbashkët për eliminimin e burokracive që rëndojnë bujqit këndej e andej kufiri.
“Kosova dhe Shqipëria në sektorin e bujqësisë nuk janë shtete konkurruese sa janë komplementare. Gjatë gjithë vitit, qytetarët tanë, falë punës së palodhshme të bujqve tanë, mund të shërbehen me prodhime shqiptare” shtoi mes tjerash ministri Peci.
Integrimi në politikat dhe mekanizmat e fondeve të para-anëtarsimit në BE, IPA dhe akreditimi për IPARD, mbeten një synim i ministrit Peci, andaj përmes realizimit të projekteve të përbashkëta e shkëmbimit të eksperiencës dhe ekspertizës në këtë fushë, do të jetë një shtysë pozitive në sukseset e deritanishme.
Ministri Peci bashkë me përfaqësuesit e sektorit të verëtarisë dhe vreshtarisë nga Kosova do të vizitojnë qytetin e Beratit, ku pritet të takohen me homologët e tyre vendas dhe bashkërisht të vizitojnë bodrume të verës, dhe kësisoj të intensifikojnë bashkëpunimin me qëllim të shkëmbimit të përvojave në këtë sektor.